ჩვენი ახალი მოკვლევა „ქალთა მიგრაციის გენდერული ასპექტები“ იყო მთავარი თემა სენაკში, წყალტუბოში, წალენჯიხასა და ზუგდიდში (სოფელი ხურჩა) გამართულ შეხვედრებზე.
შეხვედრებს ესწრებოდნენ ქალთა მხარდაჭერის ცენტრების აქტივისტები. პრეზენტაციის შემდეგ ქალთა ჯგუფები აქტიურად ჩაერთნენ დისკუსიაში სამოქალაქო ინიციატივების იდეების შესახებ. ქალების აზრით, მნიშვნელოვანია მიგრაციის თემაზე ინფორმაციის გავრცელება, მუშაობის ჩატარება მიგრანტი დედების შვილების მხარდაჭერის და ქალთა ეკონომიკური გაძლიერების კუთხით, ასევე აუცილებელია ქალების ინფორმირება, თუ რა დამცავი მექანიზმები არსებობს იმ შემთხვევაში, როცა ისინი მიდიან სხვა ქვეყნებში და ვის შეიძლება მიმართონ საჭიროების დროს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქუთაისის ქალთა ჯგუფებთან მიგრაციის საკითხებზე სამოქალაქო დიალოგი გაიმართა. შეხვედრის მონაწილეები - სხვადასხვა სოციალური ჯგუფის წარმომადგენელი ქალები - გაეცნენ ქალთა ფონდი „სოხუმის“ კვლევას „ქალთა მიგრაციის გამომწვევი მიზეზების გენდერული განზომილება: უფლებრივი მდგომარეობისა და სოციალურ-სტრუქტურული ფაქტორების ჭრილში“. შემდეგ გაიმართა დიალოგი ქალთა მიგრაციის მიზეზებზე და მის სოციალურ შედეგებზე, მიგრაციის პრევენციის ღონისძიებებზე.
მონაწილეებმა მოიყვანეს არაერთი მაგალითი - პოზიტიური ეკონომიკური ეფექტის პარალელურად, როგორი მატრავმირებელი ეფექტი აქვს მიგრაციას თავად მიგრანტ ქალებზე, მათი ოჯახის წევრებზე, განსაკუთრებით - ბავშვებზე. გულისტკივილით აღნიშნეს გაუცხოების და სხვა ფსიქოემოციური სირთულეების მომენტები.
შედგა დისკუსია იმის თაობაზე, სტრუქტურულ გადაწყვეტილებებთან ერთად, რა ძალისხმევა შეიძლება გასწიონ საზოგადოების რიგითმა წევრებმა, რათა შემცირდეს მიგრაციის ტენდენცია, შემცირდეს მისი ფსიქოემოციური ნეგატიური შედეგები.
გამოითქვა საინტერესო იდეები თემის დონეზე გასატარებელი ღონისძიებების, ამისთვის საჭირო რესურსების შესახებ. შემდგომ ეტაპზე ყველაზე საინტერესო ინიციატივების შერჩევა და მისი განხორციელება იგეგმება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ურთიერთდახმარების ჯგუფის მორიგ შეხვედრებზე განიხილეს სხვადასხვა ქეისი, იმსჯელეს პრობლემებზე, ეკონომიკური მდგომარეობის გაუმჯობესებაზე. წყალტუბოში ქალები ეძებენ სეზონურ სამუშაოებს (მოცვის, თხილის შეგროვება ან ზღვისპირა კურორტებზე მუშაობა). ზოგიერთ მათგანს აქვს ეს გამოცდილება და სხვებსაც ურჩევს, რადგან ამ შემოსავლებით ბევრ საჭიროებას მოაგვარებენ...
ხობში ჯგუფის ერთ-ერთ წევრს გადაეცა სმარტფონი, რაც გაამარტივებს მისთვის აუცილებელ კომუნიკაციას.
ქობულეთის ჯგუფის წევრები განსაკუთრებით ემადლიერებიან ჩვენს ორგანიზაციას, რადგან ამდენი სითბო და ყურადღება არავის გამოუხატავს მათ მიმართ.
ჩოხატაურის ჯგუფთან ონლაინ ჩართვა გაიმართა. ჩვენი ორგანიზაციის ფსიქოლოგიც ჩაერთო, როგორც სხვა შეხვედრებში. ურთიერთდახმარების ჯგუფის წევრების აზრით, ფსიქოლოგის სასარგებლო რჩევები მათთვის სერიოზული მხარდაჭერაა.
შეხვედრების მონაწილეებისთვის დიდი სტიმულია, რომ ასეთი ჯგუფი 10 მუნიციპალიტეტში მოქმედებს და, პროექტის ასისტენტის, ნინო ჭაბუკიანის დახმარებით, მათ აქვთ ერთმანეთის გამოცდილების გაზიარების შესაძლებლობა.
პროექტი ხორციელდება თანასწორობის ფონდის მხარდაჭერით (კანადა)
ოთხი შეხვედრა შედგა სენაკის, წყალტუბოს, წალენჯიხის და ზუგდიდის (სოფელი ხურჩა) ქალთა მხარდაჭერის ცენტრების აქტივისტ ქალებთან.
შეხვედრის მონაწილეები გაეცნენ ჩვენს ახალ მოკვლევას „ქალთა მიგრაციის გენდერული ასპექტები“. პრეზენტაციის შემდეგ გაიმართა დისკუსია, რა გავლენას ახდენს მიგრაციულ გადაწყვეტილებებზე მათი სოციალურ-ეკონომიკური და უფლებრივი მდგომარეობა და ინტერსექციული მოწყვლადობის ფაქტორები.
ფრაგმენტები მონაწილეთა გამოსვლებიდან:
„მიგრაცია ჩვენი დღევანდელობის სერიოზული პრობლემაა - ეკონომიკური ფაქტორების თუ მოწყვლადობის გამო. ბევრია წასული ემიგრაციაში და ყველაზე მეტად ეს პრობლემა ქალებს ეხება“.
„გამოსავლის არქონის გამო ქალებს უწევთ ემიგრაციაში წასვლა, საბოლოოდ კი ჩვენი რეალობაა ოჯახების გაუცხოება და უდედოდ გაზრდილი თაობები“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ხონის და ხობის მუნიციპალიტეტების ქალთა ჯგუფებთან მიგრაციის ფსიქოსოციალური, ეკონომიკური, სამართლებრივი, სტრუქტურული ასპექტების და მისი პრევენციის საკითხზე დისკუსიები ჩატარდა. ისინი გაეცნენ საქველმოქმედო ჰუმანიტარული ქალთა ფონდი სოხუმის კვლევის მიგნებებს და ისაუბრეს მიგრაციის პრევენციის და მისი ნეგატიური შედეგების შემცირების გზებზე
ქალებს ჰქონდათ ცხოვრებისეულ გამოცდილებაზე დაფუძნებული ხედვები, რამდენად მნიშვნელოვანია და რა უნდა გაკეთდეს მიგრაციის შემცირებისა და მისი შედეგების შემსუბუქების, ემიგრაციაში მყოფი ქალების რეინტეგრაციისა და მათ ოჯახებში ფსიქოსოციალური კლიმატის გაუმჯობესებისთვის.
ისინი თვლიან, რომ აქვთ პატარა სამოქალაქო ინიციატივების განხორციელების რესურსი და შეუძლიათ ინიცირება გაუკეთონ შეხვედრების ჩატარებას მიგრაციის რისკებზე, თუნდაც რეალურ ისტორიებზე დაფუძნებული დისკუსიებით. განსაკუთრებული ინტერესი გამოიკვეთა ბავშვების ემოციურ და ქცევით მდგომარეობაში შესაძლო უარყოფითი ცვლილებების შესახებ ცნობიერების ამაღლების მიმართ, რადგანაც ხედავენ უამრავ ნეგატიურ მაგალითს, რომელიც აუარესებს ოჯახების და, ზოგადად, საზოგადოებრივ კლიმატს.
მომდევნო შეხვედრებზე კონკრეტული იდეების განხილვა მოხდება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
საინტერესო დისკუსია გაიმართა ხონის დევნილთა დასახლების ქალთა ჯგუფთან. საუბრის თემა იყო მიგრაციის ფსიქოსოციალური, ეკონომიკური, სამართლებრივი, სტრუქტურული ასპექტები. მონაწილეებმა გაგვიზიარეს თავიანთი ხედვა, რა ახდენს გავლენას მიგრაციის მასშტაბებზე, როგორია მისი სოციალური შედეგები და გვერდითი ეფექტები, რა შეიძლება გაკეთდეს მიგრაციის პრევენციისთვის.
„როცა სტატისტიკით, ბოლო წლებში ემიგრირებულთა 43% არის 15 წლამდე ასაკის ბავშვი, რა თქმა უნდა, განგაშის მიზეზი ნამდვილად გვაქვს“.
„ხონში მიგრაციის დიდი ტალღა 10-15 წლის წინათ იყო. ქალებში წამსვლელიც არავინ დარჩა. ახლა უფრო მეტად ახალგაზრდების მიგრაციაა“.
„მიდიან და უკან დამბრუნებელი, ფაქტობრივად, არავინაა“.
„მიგრაციის პრევენციისთვის, პირველ რიგში, საზოგადოებას მისი სოციალური შედეგები უნდა გავაცნოთ. ერთად მოვიფიქროთ, რა სჭირდებათ ადამიანებს, განსაკუთრებით - ქალებს, იმისთვის, რომ არ გადადგან ეს ნაბიჯი“.
გაჟღერდა ბევრი კონკრეტული იდეა, რომელიც შეეხება იმ სფეროებს, სადაც ქალების დასაქმების რეალური შესაძლებლობები უნდა გაჩნდეს და მათი მხარდაჭერის პირობები შეიქმნას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ურთიერთდახმარების ჯგუფების შეხვედრების ნაწილი მუნიციპალიტეტებში გაიმართა, ნაწილი კი - ონლაინ.
წალენჯიხაში გაჟღერდა ერთ-ერთი ძალადობაგამოვლილი ქალის ისტორია. დაიგეგმა ახალი ქეისის დამუშავება, დახმარების გაწევა. თერჯოლაში ჯგუფს დაემატა ახალი წევრები. წყალტუბოს შეხვედრაზე მონაწილეებმა ისაუბრეს თავიანთ საჭიროებებზე. მათი სურვილია ჭრა-კერვის და პოლიმერულ თიხაზე მუშაობის კურსების ორგანიზება. ეს ხელს შეუწყობს მათ ეკონომიკურ გაძლიერებას.
ფსიქოლოგის ჩართვა განსაკუთრებულ ეფექტს სძენს შეხვედრებს, რადგან კომპეტენტური რჩევები თითოეულ მონაწილეს სჭირდება.
ჯგუფების წევრები დარწმუნებულები არიან, რომ ერთად, ურთიერთდახმარებით ბევრ პრობლემას მოაგვარებენ.
პროექტი ხორციელდება თანასწორობის ფონდის მხარდაჭერით (კანადა)
სასტუმრო „გელათი რეზიდენსში“ აკაკი წერეთლის სახელობის ქუთაისის სახელმწიფო უნივერსიტეტის ოცდაათზე მეტი სტუდენტი და უფროსკლასელი მოსწავლე შეიკრიბა, რათა ემსჯელათ:
- როგორ ვისაუბროთ რთულ თემებზე ისე, რომ არ დავკარგოთ მოსმენისა და გაგების უნარი?
- როგორ ავიცილოთ თავიდან კონფლიქტი და დაძაბულობა?
ვორკშოპი არ იყო მხოლოდ თეორიული - პირიქით!
მონაწილეებმა გაიზიარეს რეალური ისტორიები და გამოცდილებები, ზოგჯერ - მწვავე და ემოციური დიალოგებიც.
ერთ-ერთმა სტუდენტმა საკუთარი რეფლექსია გაგვიზიარა:
„დღევანდელ რეალობაში, როდესაც საზოგადოებაში თანასწორობის დამკვიდრებას მრავალი გავრცელებული გენდერული სტერეოტიპი და დეზინფორმაცია უშლის ხელს, მნიშვნელოვანია, ვფლობდეთ მათთან სწორი გამკლავების ხერხებს. ადამიანთა უმეტესობისთვის ეს სტერეოტიპები ყოველდღიური ცხოვრების ნაწილია და მათი შეცვლა - სწორი კომუნიკაციის გარეშე - შეუძლებელია. რთული დიალოგების სწორად წარმართვა უმნიშვნელოვანესია. ვფიქრობ, ამგვარი ტრენინგები ნამდვილად უწყობს ხელს ამ უნარების განვითარებასა და გვაძლევს საშუალებას, გენდერულ სტერეოტიპებს ეფექტურად გავუმკლავდეთ.“
Zoom პლატფორმაზე, მოსწავლეებმა (67 მონაწილე), დასავლეთ საქართველოს 10 მუნიციპალიტეტიდან (ჩოხატაური, ქობულეთი, წყალტუბო, ქუთაისი, ხონი, თერჯოლა, სამტრედია, სენაკი, ზუგდიდი, წალენჯიხა) მონაწილეობა მიიღეს ვორკშოპში „როგორ ვმართოთ რთული დიალოგი“, რომელიც მიზნად ისახავდა განსხვავებული შეხედულებების მქონე ადამიანებთან კონსტრუქციული საუბრის და კონფლიქტების თავიდან აცილების უნარების განვითარებას. შეხვედრის მთავარი თემები იყო:
- სტერეოტიპების, დეზინფორმაციისა და ინფორმაციის გამიჯვნა
- რთული დიალოგის 5 პრაქტიკული სტრატეგია
- ინტერაქტიური თამაში: „როგორ გადავურჩეთ ოჯახურ ვახშამს“ - https://survivefamilydinner.ge/how-to-play/
ონლაინ ფორმატშიც კი შეხვედრა იყო ცოცხალი და ინტერაქტიული - მოსწავლეები აქტიურად აზიარებდნენ თავიანთ პირად გამოცდილებებს, სვამდნენ კითხვებს და გზადაგზა აჟღერებდნენ საკუთარ რეფლექსიებსაც.
