ეკონომიკური კონტროლი არის ძალადობის ერთ-ერთი ფორმა, როდესაც ადამიანს თანდათან ართმევენ ფინანსურ დამოუკიდებლობასა და არჩევანის თავისუფლებას. თანამედროვე რეალობაში ეს ხშირად ხორციელდება ტექნოლოგიების გამოყენებით — ციფრული გადახდების კონტროლით, ფინანსურ ანგარიშებზე წვდომით, შეტყობინებების მონიტორინგით.
„იმ დღიდან ჩემი ფული აღარ იყო ჩემი.
არჩევანის უფლება ნელ-ნელა გაქრა და ზრუნვა კონტროლად იქცა.“
ეს არის ეკონომიკური კონტროლი — ტექნოლოგიური ძალადობის ერთ-ერთი ყველაზე შეუმჩნეველი, მაგრამ ყველაზე მტკივნეული ფორმა.
ის არ ტოვებს ხილულ კვალს, თუმცა ღრმად აზიანებს ადამიანის ღირსებას, თავისუფლებასა და უსაფრთხოების განცდას.
პროექტი ხორციელდება WAVE ქსელის მხარდაჭერით
ფოტოებით შანტაჟი არის ტექნოლოგიებით განხორციელებული ძალადობის ერთ-ერთი მძიმე ფორმა, რომელიც ხშირად იწყება თითქოს სიყვარულითა და ნდობით.
„თავიდან ყველაფერი თითქოს სიყვარულით დაიწყო. „გამომიგზავნე ფოტო, მხოლოდ ჩემთვის იქნება“... მაგრამ ეს ნდობა გადაიქცა შიშად, მუქარად და ემოციურ ძალადობად,“ — ლიკა, 23 წლის
ფოტოების ან პირადი მასალის უნებართვო გავრცელების მუქარა გამოიყენება კონტროლის, შიშის და ძალაუფლების მოსაპოვებლად.
ნდობა დანაშაული არ არის.
დანაშაულია მისი ბოროტად გამოყენება.
პროექტი ხორციელდება WAVE ქსელის მხარდაჭერით
ქეთის ისტორია გვიყვება ტექნოლოგიების გამოყენებით ჩადენილი ძალადობის ერთ-ერთ ყველაზე გავრცელებულ და ხშირად შეუმჩნეველ ფორმაზე — კიბერ თვალთვალზე.
ურთიერთობაში ლოკაციის გაზიარება თითქოს ზრუნვის ნიშნით დაიწყო, თუმცა დროთა განმავლობაში გადაიქცა ქეთის ყოველდღიური ცხოვრების სრულ მონიტორინგად. მისი გადაადგილება მუდმივი დაკვირვების ქვეშ აღმოჩნდა: სად მიდიოდა, ვისთან მიდიოდა, როდის ბრუნდებოდა და რატომ „ქრებოდა“ რუკიდან.
ის, რაც თავდაპირველად უსაფრთხოებისა და მზრუნველობის გამოვლინებად აღიქმებოდა, რეალურად კონტროლის მექანიზმად ჩამოყალიბდა.
ეს არ არის სიყვარული.
ეს არ არის ზრუნვა.
ეს არის კონტროლი — ტექნოლოგიებით განხორციელებული ძალადობის ფორმა.
თუ მსგავსი გამოცდილება გაქვთ, იცოდეთ: თქვენ არ ხართ მარტო.
ტექნოლოგიებით განხორციელებული ძალადობა რეალურია, ხოლო მისი ამოცნობა — პირველი და მნიშვნელოვანი ნაბიჯია თავისუფლებისა და უსაფრთხოებისკენ.
პროექტი ხორციელდება WAVE ქსელის მხარდაჭერით
ტექნოლოგიებით ხელშეწყობილი ქალთა მიმართ ძალადობა (TFVAW) ხშირად შეუმჩნევლად იწყება: ყოველდღიურ ციფრულ კომუნიკაციებში, ურთიერთობაში „ნდობის“ სახელით გაზიარებულ წვდომებსა და კონტროლის ნორმალიზებაში.
ვიდეოში წარმოდგენილია თამარის რეალური ისტორია. მისი მონათხრობი გვიჩვენებს, როგორ შეიძლება პარტნიორულ ურთიერთობაში პაროლების გაზიარება, პირადი სივრცის შეზღუდვა და მუდმივი კითხვები თავდაპირველად სიყვარულად აღიქმებოდეს, თუმცა დროთა განმავლობაში კი - კონტროლისა და თავისუფლების დაკარგვის წყაროდ გადაიქცეს.
„პაროლები მივეცი, რადგან მეგონა, ასე შენდებოდა ნდობა. იმ დღიდან ჩემი ცხოვრება მე აღარ მეკუთვნოდა. კითხვები, აკრძალვები, კონტროლი... ყველაფერი სიყვარულის სახელით. და მე ნელ-ნელა ვკარგავდი საკუთარ თავს,“ — თამარი.
ქალთა და გოგონათა მიმართ ტექნოლოგიებით წახალისებული ძალადობა უხილავია, მაგრამ მისი შედეგები რეალური და მძიმეა. ის ზღუდავს ადამიანის ავტონომიას, უსაფრთხოების განცდას და თვითიდენტობას.
თუ არსებობს განცდა, რომ ვინმე აკონტროლებს თქვენს ციფრულ სივრცეს, ეს არის მნიშვნელოვანი სიგნალი. ურთიერთობა არ უნდა მოითხოვდეს პირადი თავისუფლების დათმობას.
თავისუფლება არასოდეს უნდა იყოს სადავო.
პროექტი ხორციელდება WAVE ქსელის მხარდაჭერით
ქუთაისის სავაჭრო-სამრეწველო პალატაში, ქალთა ფონდმა „სოხუმი“ გამართა რეგიონული კონფერენცია „16 აქტიური დღე გენდერული ძალადობის წინააღმდეგ“ კამპანიის ფარგლებში. ღონისძიების მიზანი იყო ქალთა მიმართ ძალადობის პრევენციისა და რეაგირების მრავალწლიანი გამოცდილების შეჯამება და 2025 წლის შედეგების გაზიარება.
კონფერენციას ესწრებოდა 70-მდე მონაწილე იმერეთის, გურიის, სამეგრელოსა და აჭარის 10 მუნიციპალიტეტიდან — ქალთა მხარდაჭერის ცენტრების მობილიზატორები, სოციალურ მუშაობის პარასპეციალისტები, ახალგაზრდები, სამოქალაქო ორგანიზაციები და საერთაშორისო პარტნიორები.
მონაწილეებმა განიხილეს ძალადობის პრევენცია როგორც ინდივიდუალური შემთხვევების, ასევე სისტემური და სტრუქტურული გამოწვევების ჭრილში.
კონფერენცია მოიცავდა სამ თემატურ პანელს:
ქალთა ჯგუფებთან ადგილზე მუშაობა
პრაქტიკული გამოცდილება: რისკების იდენტიფიცირება, პირველადი დახმარება, ტრავმაზე რეაგირება, თემის მხარდაჭერის მექანიზმების გაძლიერება.
ახალგაზრდების ინიციატივები
ახალგაზრდებმა წარმოადგინეს კამპანიები და მცირე თემობრივი პროექტები, სადაც გამოიკვეთა ახალგაზრდების მზარდი როლი თემების პოზიტიურ ცვლილებაში.
ძალადობის მსხვერპლ ქალებთან მუშაობა
ფოკუსი: ფსიქოლოგიური დახმარება, ეკონომიკური გაძლიერება, სარეაბილიტაციო ცენტრები, მედიაწიგნიერება და ციფრული უსაფრთხოება.
ღონისძიების დასასრულს განსაკუთრებულად გამოიკვეთა, რომ 2025 წელს ყველაზე სწრაფად მზარდი საფრთხე არის ტექნოლოგიებით ხელშეწყობილი ძალადობა — ონლაინ თვალთვალი, კიბერბულინგი, ანგარიშებზე უნებართვო წვდომა და ციფრული მანიპულაცია.
პროექტი ხორციელდება Brot für die Welt-ის მხარდაჭერით.
საინფორმაციო გზამკვლევი: „პარტნიორულ ურთიერთობებში ტექნოლოგიების გამოყენებით ჩადენილი ძალადობა – ამოიცანი და დაიცავი თავი“ წარმოადგენს პრაქტიკულ გზამკვლევს, რომელიც ეხმარება ქალებსა და გოგონებს ამოიცნონ ციფრულ სივრცეში განხორციელებული კონტროლი, თვალთვალი და დაშინება, როგორც ძალადობის ფორმა. გამოცემა აღწერს ციფრული ძალადობის ტიპებს, სამართლებრივ მექანიზმებსა და თავდაცვის გზებს, აძლიერებს ცნობიერებას და მოუწოდებს ყველას – ამოიცანი, ისაუბრე, იმოქმედე!
პუბლიკაცია მომზადებულია საქველმოქმედო-ჰუმანიტარული ქალთა ფონდი „სოხუმის“ მიერ, WAVE ქსელის მხარდაჭერით.
პროექტი ხორციელდება WAVE ქსელის მხარდაჭერით
ტექნოლოგიების გამოყენება კონტროლისთვის, თვალთვალისთვის და ზეწოლისთვის პარტნიორულ ურთიერთობებში წარმოადგენს ციფრულ ძალადობას.
ის ხშირად იწყება შეუმჩნეველი ნიშნებით და შეიძლება გადაიზარდოს სერიოზულ დანაშაულებში - პირადი მონაცემების მოპოვებიდან კიბერმუქარამდე.
პროექტი ხორციელდება ქალთა ფონდი „სოხუმის“ მიერ WAVE ქსელის მხარდაჭერით.
ერთმანეთის დახმარებას, ერთმანეთისთვის სტიმულის მიცემას და გაძლიერებას ემსახურება ქალთა ურთიერთდახმარების ჯგუფები. განსაკუთრებით საინტერესოა, როცა შეკრებილები წარმატებული ქალების ისტორიას ისმენენ და ფსიქოლოგიც თვითშეფასების ამაღლებისკენ მოუწოდებს.
ქუთაისის ქალთა ურთიერთდახმარების ჯგუფს წარმატებული სტუმარი ჰყავდა. ასე იყო წყალტუბოს და თერჯოლის შეხვედრებზე. ეს კარგი მოტივაცია იყო ჯგუფის წევრებისთვის.
ნაყოფიერი შეხვედრები გაიმართა ხურჩაში, ქობულეთში. ქალებმა სხვადასხვა საკითხზე ისაუბრეს, მათ შორის ფონდი „სოხუმის“ მხარდაჭერის შესახებ. თერჯოლაში ჯგუფის წევრების წინაშე გამოვიდა ჩვენი ფორუმ-თეატრი და წარმოდგენებს გულახდილი, ემოციური დისკუსია მოჰყვა...
ნოემბერში შეხვედრები ჩატარდა ყველა ჯგუფში. ყოველი ახალი შეხვედრა იმის დასტურია, რომ ჩვენი ორგანიზაცია ზრუნავს რეგიონებში მცხოვრები ქალების გაძლიერებისთვის.
პროექტი ხორციელდება თანასწორობის ფონდის მხარდაჭერით (კანადა)
ქალთა ურთიერთდახმარების ჯგუფის შეხვედრებზე განსაკუთრებული აქცენტი გაკეთდა ჩვენი ორგანიზაციის ვებგვერდზე „ძალადობაგამოვლილ ქალთა სერვისების ციფრული რესურსცენტრი“ https://sosfsokhumi.ge/, რომელიც ყველა საჭირო ინფორმაცია აძლევს ქალებს.
ასევე ყველა მონაწილეს მიეწოდა ინფორმაცია კამპანიის „16 აქტიური დღე ქალთა მიმართ ძალადობის წინააღმდეგ“ შესახებ.
მონაწილეებს ჰქონდათ არაერთი შეკითხვა კამპანიის შესახებ, მუნიციპალურ პროგრამებზე, სოციალურად დაუცველი ოჯახების დახმარებაზე და სათანადო პასუხებიც მიიღეს.
ყველა ჯგუფი აქტიურად ჩაერთვება 16-დღიან კამპანიაში, რადგან ეს კამპანია სწორედ მათნაირი ქალების მხარდასაჭერად იმართება მთელ მსოფლიოში.
პროექტი ხორციელდება თანასწორობის ფონდის მხარდაჭერით (კანადა)
