...

მოახლებული ადგილობრივი თვითმმართველობის არჩევნებისათვის მზადება უკვე დაეტყო  ქუთაისის ამომრჩეველ ქალთა კლუბს.

საიას- ქუთაისის ფილიალის დირექტორმა ნინო თვალთვაძემ, რომელიც ამომრჩეველ ქალთა კლუბის წევრიცაა, შეხვედრის მონაწილეებთან ვორკშოპი ჩაუტარა თემაზე: „საარჩევნო კანონი და მასთან დაკავშირებული ცვლილებები".

დისკუსიისას ბევრი შეკითხვა გაჩნდა არჩევნებთან დაკავშირებით: რამდენი წევრით იქნება დაკომპლექტებული საკრებულო, რამდენად სანდოა საარჩევნო სიები,  როგორ მიდის მუშაობა პარტიებში ქალი  კანდიდატების გამოსავლენად.

კლუბის წევრები შეხვედრას მნიშვნელოვანს უწოდებენ და თვლიან, რომ საარჩევნო კანონის ცოდნა მისცემს მათ საშულებას იმუშაონ ამომრჩევლებთან, რათა მათი ცნობიერების დონე ამაღლდეს და ხელი შეუწყონ ქალთა რიცხვის გაზრდას ადგილობრივ თვითმმართველობაში.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

იმ ფონზე, როცა საქართველოში ოფიციალურ დონეზე თითქმის შეწყვეტილია დიალოგი ქართულ -აფხაზურ, ქართულ- ოსურ საზოგადოებებს შორის, როცა სულ უფრო მნიშვნელოვანი ხდება ახალი სამშვიდობო გზების ძიება და სამშვიდობო საქმიანობაში ქალთა აქტიური მონაწილეობა, აფხაზეთიდან და ცხინვალის რეგიონიდან დევნილი ქალები ერთიანდებიან  და აქტიურ მუშაობას იწყებენ მშვიდობისა და უსაფრთხოებისათვის, ნდობის აღდგენისათვის.

4 მარტს ქუთაისში, ფონდი „სოხუმის" ოფისში მრგვალი მაგიდა მოეწყო თემაზე „ქალის როლის ამაღლება კონფლიქტის მშვიდობიანი გზით მოგვარებისა და ნდობის აღდგენის პროცესებში". შეხვედრის ორგანიზატორი იყო „საქართველოს ინვალიდ-მეომართა  და დაღუპულ მებრძოლთა მეუღლეთა კავშირი" და კულტურულ- ჰუმანიტარული ფონდი „სოხუმი".

- ჩვენ ერთი ტკივილი გვაერთიანებს, ერთი სატკივარი გვაწუხებს, მხოლოდ  ერთობლივად, ერთად დგომით  უნდა მოვნახოთ გზა აფხაზებთან და ოსებთან  შესარიგებლად. მხოლოდ სოლიდარობით მიიღწევა მშვიდობა და უსაფრთხოება, -  ითქვა შეხვედრაზე.

თბილისში CTC- ს ს ოფისში სამი დღის განმავლობაში მიმდინარეობდა კონფერენცია, რომლის ორგანიზტორები იყვნენ საერთაშორისო დონორი ორგანიზაციები  BfdW და EED.

მონაწილებდა 34 ეროვნული ორგანიზაცია სამხრეთ კავკასიის ქვეყნებიდან: სომხეთი აზერბაიჯანი, საქართველო.

 კონფერენციის თემა იყო: ორი ორგანიზაციის BfdW-სა და EED-ს შერწყმა და მასთან დაკავშირებული საკვანძო საკითხები.

 კონფერენციაზე გადახედეს აგრეთვე  ორგანიზაციის პერსპექტივებსა და ხედვებს 2010 წლამდე.

მუშაობა წარიმართა როგორც ლექციური, ასევე ინტერაქტიული მეთოდებით.

მონაწილეებმა შეიძინეს ახალი ცოდნა, ასევე გაარკვიეს მომავალი მუშაობის პერსპექტივები.

ხონში, ქალთა მხარდაჭერის ცენტრში ლიდერთა სკოლისათვის შესარჩევი მორიგი ტრენინგი ჩატარდა. სამდღიან ტრენინგზე გოგონებს საშუალება ჰქონდათ გამოევლინათ საკუთარი შესაძლებლობები. პრაქტიკული სავარჯიშოების, როლური თამაშებისას კარგად გამოიკვეთა მათი ლიდერული უნარ-ჩვევები.

-  ბუნებრივია, ლიდერთა სკოლაში ყველა ვერ მოხვდება, მაგრამ თვითონ ტრენინგი კარგი სკოლაა იმისათვის, რომ საკუთარი შესაძლებლობები მოვსინჯოთ, გავაანალიზოთ რისი გაკეთება შეგვიძლია -აღნიშნავდნენ მონაწილეები.

დასავლეთ საქართველოს შვიდ  ქალაქში მოქმედ ამომრჩეველ ქალთა კლუბს კიდევ ერთი დაემატა: პირველ მარტს წყალტუბოში ახალი კლუბი დაფუძნდა.

პირველი შეხვედრა გაცნობითი ხასიათის იყო. მონაწილეებს მიეწოდათ ინფორმაცია ფონდი „სოხუმის" საქმიანობაზე, პროექტის ძირითად მიზნებზე, ამოცანებზე, კლუბის სამომავლო გეგმებზე.

გაცნობისას გამოიკვეთა მონაწილეთა პოზიცია. შეკრებილებმა ცალსახად დააფიქსირეს, რომ აუცილებელია ქალთა გააქტიურება და მათი აქტიური ჩართვა პოლიტიკაში.

გაიცა კონსულტაცია, თუ რა შემთხვევაშია შესაძლებელი დევნილთა იძულებით გამოსახლება  მათ მიერ დაკავებული ობიექტიდან და ვინ არის გამოსახლების განმახორციელებელი ორგანო.

 იურისტისგან მოსწავლეებმა მიიღეს კონსულტაცია მშობელთა უფლებებზე და მოვალეობებზე. ოჯახში ძალადობისაგან არასრულწლოვანთა დაცვის სპეციფიკურ ღონისძიებებზე.

თებერვლის თვეში პოლიტიკურ პარტიებთან ჩატარებული შეხვედრების მთავარ მიზანს წარმოადგენდა ამომრჩეველ ქალთა კლუბებთან თანამშრომლობის სამომავლო გეგმების დასახვა და ადგილობრივი თვითმმართველობის არჩევნებისთვის პარტიების მზადების  შეფასება.

შეხვედრები ჩატარდა შემდეგი პოლიტიკური პარტიების წარმომადგენლებთან: ერთიანი ნაციონალური მოძრაობა (ფოთი, ბათუმი), რესპუბლიკური პარტია (ფოთი), ახალი მემარჯვენეები (ბათუმი). 

ერთიანი ნაციონალური მოძრაობის ბათუმის საქალაქო ორგანიზაციაში აცხადებენ, რომ ქალთა წარმომადგენლობის გაზრდა პოლიტიკაში პირდაპირ კავშირშია საზოგადოებრივ დაკვეთასთან. ვინაიდან ამომრჩეველთა 56% ქალები არიან, არსებობს უფრო მეტი  შანსი პოლიტიკური პარტიების წინაშე ამ მოთხოვნის წარმოსაჩენად. ამისათვის საჭიროა ამომრჩეველი ქალების მობილიზება და მათთან მუშაობის გაძლიერება ერთი საერთო მიზნის მისაღწევად.

ახალი მემარჯვენეების ბათუმის საქალაქო ორგანიზაცია დიდ იმედებს ამყარებს მათი პარტიის წევრ ლიდერ ქალებზე, რომლებსაც გააჩნიათ წარმატებული პოლიტიკოსისთვის საჭირო ყველა თვისება: პროფესიონალიზმი, ავტორიტეტულობა, პასუხისმგებლობა და სხვა. ერთ-ერთი ასეთი ქალბატონი, სოფო კახაძე ხელმძღვანელობს ქალთა საბჭოს ამ პარტიაში. ახალ მემარჯვენეებიდან საარჩევნო კომისიების წევრების უმრავლესობას ქალები წარმოადგენენ.

რესპუბლიკურ პარტიის ფოთის საქალაქო ორგანიზაციის წევრთა სიაში დაახლოებით 40%-ს ქალები წარმოადგენენ. აცხადებენ, საარჩევნო სიების შედგენა ეფუძნება ლიბერალურ პრინციპებს, რაც გულისხმობს კანდიდატების თავისუფალ შერჩევას, ქალებს და მამაკაცებს უფლება აქვთ თანაბრად იყვნენ წარმოდგენილები საარჩევნო სიებში. 

თებერვალის თვეში ფონდი „სოხუმის" ფსიქოლოგმა 16 კოლექტიური შეხვედრა მოაწყო იმერეთის რეგიონის სხვადასხვა ქალაქებში (ქუთაისი, წყალტუბო, ხონი, სამტრედია). ფსიქორეაბილიტაცია გაიარა 144 -მა  ქალმა. მათ შორის ინდივიდუალურ შეხვედრაზე ფსიქოლოგს დახმარებისათვის მიმართა 18 ქალმა.  

ფსიქოლოგი აღნიშნავს, რომ ქალები ყველა რეგიონში ძირითადად განსახლების საკითხზე არიან ორიენტირებული. გარდა ამისა, ხშირად საუბრობენ ოჯახურ პრობლემებზე, რომ მცირე შემოსავალი ოჯახში ხშირად ხდება კონფლიქტის საფუძველი. არის შემთხვევები, როცა დედები დახმარებას ითხოვენ ფსიქოლოგისგან იმის გამო, რომ საკუთა შვილებს ვეღარ ცნობენ, ვერაფრით ხვდებიან, რატომ გახდნენ ისინი აგრესიულები.

- ბევრ სასიკეთო რჩევებს ვიღებთ, ბევრად უფრო დაწყნარებულები გამოვდივართ ამ შეხვედრიდან.

- ერთმანეთს ვეხმარებით, ერთმანეთის მხარდაჭერას ვგრძნობთ. ფსიქოლოგი სწორ მიმართულებას გვაძლევს, როგორ მივხედოთ საკუთარ პრობლემებს.

23-25 თებერვალს ფონდ „სოხუმში" სამდღიანი ტრენინგი გაიმართა თემაზე : ოჯახური ძალადობის პრევენცია", რომელშიც მონაწილეობდნენ არასამთავრობო ორგანიზაციის წარმომადგენლები, სტუდენტები, უფროსკლასელები.

ოჯახი- როგორც სოციალური ინსტიტუტი; ოჯახის წევრთა ურთიერთობები; მოვალეობათა გადანაწილება; გენდერული სტერეოტიპები; კონფლიქტები ოჯახში, როგორც ძალადობის ერთ-ერთი ელემენტი.

ეს და სხვა თემები იყო ტრენინგზე განხილვის საგანი.

მონაწილეებმა მიიღეს ინფორმაციები ოჯახური ძალადობის საკითხებზე. დასახელდა არაერთი რეალური მაგალითი, როცა ქალი მსხვერპლად გვევლინება. მონაწილეთა აზრით, ამის მიზეზი ხშირად საკუთარი უფლებების არცოდნაა.

სტრესი, მისი სუბიექტური და ობიექტური მიზეზები; რა არის ფსიქოლოგიური ტრავმა, მისი გამოვლინებები; იმ ადამიანების ემოციები და გრძნობები, რომელთაც სტრესი გადაიტანეს;- ეს საკითხები ტრენინგის ბოლო ბლოკში იქნა განხილული.

მორიგი რადიოგადაცემა ციკლიდან  "ქალი და არაძალადობრივი საზოგადოება” რადიო "ძველი ქალაქის” მსმენელს სპეციალისტების,  უბრალო ადამიანების,  თვითონ ძალადობის მსხვერპლი ქალების მოსაზრებას სთავაზობს  ოჯახში ძალადობის საზოგადოებისათვის მეტად მტკივნეულ თემასთან დაკავშირებული საკითხების ირგვლივ.

...ფონდი "სოხუმის” ფსიქოლოგი ფსიქო-რეაბილიტაცის პროგრამაზე საუბრობს, რომლის ფარგლებში არაერთი ქალის პრობლემა ხდება საცნაური. მისასალმებელია, რომ ფსიქოლოგის ინსტიტუტი თანდათან მკვიდრდება.

...იურიდიული კონსულტაციების მნიშვნელოვანი ნაწილი ძალადობის წინააღმდეგ მიმართულ კანონში შეტანილ ცვლილებებს ეხება, რომელთა  მეტი წილი 2010 წლის აპრილიდან შედის ძალაში.

...რეპროდუქციული ჯანმრთელობის თემა პირდაპირ უკავშირდება ქალის ოჯახში ძალადობისაგან დაცვის საკითხს, - ასე თვლიან  სპეციალისტები, რომლებიც ფონდის თაოსნობით არიან ჩართული   პროგრამაში.

„ქალი პოლიტიკაში - რთული არჩევანი"- ფონდი „სოხუმის" მიერ გადაღებული ფილმის განხილვით დაიწყო ამომრჩეველ ქალთა კლუბის შეხვედრა ქუთაისში. ფილმის ჩვენების შემდეგ მონაწილეებმა მსგავსი ფილმების  მნიშვნელობაზე ისაუბრეს.

-  ქალისთვის პოლიტიკაში მოსვლა მართლაც რომ რთული არჩევანია. ფილმი საინტერესოა იმ თვალსაზრისით, რომ საუბარია წარმატებულ ქალებზე, რომლებსაც ყველაფერი აქვთ იმისათვის, რომ მოვიდნენ პოლიტიკაში, მაგრამ უჭირთ არჩევანის გაკეთება, რაც კიდევ ერთხელ მინიშნებს იმაზე, რომ ქალებს მაღალი პასუხისმგებლობის გრძნობა აქვთ.

 -  ფილმი ბევრ ქალს მისცემს სტიმულს უფრო თამამად გააკეთოს არჩევანი და მოვიდეს პოლიტიკაში.

- კვოტირების სისტემამ ბევრ ცივილიზებულ ქვეყანაში გაამართლა, ურიგო არ იქნებოდა ეს მეთოდი ჩვენთანაც დაგვენერგა -  ზუგდიდის ამომრჩეველ ქალთა კლუბის წევრთა დიდი ნაწილი კვოტირების მომხრეა. წინასაარჩევნო განწყობა  ამაღლებული და ოპტიმისტურია. ქალბატონები მზადყოფნას გამოხატავენ მხარი დაუჭირონ ქალ-კანდიდატებს ადგილობრივი თვითმმართველობის არჩევნებში.

ამომრჩეველ ქალთა კლუბის წევრი ელზა კვარაცხელია, რომელიც ნაციონალური პარტიის წევრია, აცხადებს, რომ მისი მარტის ბოლოს  უკვე გამოქვეყნდება სიები, რომლებშიც ქალები  უფრო მეტი რაოდენობით იქმნიშვნელოვან ადგილზე იქნებიან.

იმ დღეს, ამომრჩეველ ქალთა კლუბის წევრებმა მათი ქალაქისათვის მნიშვნელოვანი პრობლემა დასვეს  - ზუგდიდის ბოტანიკური ბაღი, რომელიც თავისი უნიკალური მცენარეებით მსოფლიო მნიშვნელობისაა, თითქმის განადგურების პირასაა.

ხონის ამომრჩეველ ქალთა კლუბზე, კლუბის წევრთა მოთხოვნით,  მოწვეულნი იყვნენ ლტოლვილთა და განსახლების სამინისტროს იმერეთის რაჭა-ლეჩხუმისა და ზემო-სვანეთის რეგიონალური სამმართველოს წარმომადგენლები - უფროსის მოადგილე ჯანო ზოსიაშვილი და უფროსი სპეციალისტი ნუკრი ლეთოდიანი.

სტუმრებმა ის ძირითადი პრობლემები მოისმინეს, რომელიც ხონში მცხოვრებ დევნილებს აწუხებთ. საუბარი იყო კერძო კომპანიების მიერ გაჭიანურებულ და უხარისხოდ შესრულებულ სარემონტო სამუშაოებზე, ფართის არასწორად განაწილებაზე.

შეხვედრაზე გამოიკვეთა, რომ დევნილები მეტ ყურადღებას მოითხოვენ როგორც დევნილთა ადგილობრივი სამმართველოს, ასევე დევნილთა სამინისტროს მხრიდან, რადგან განსახლების პროგრამის ამოქმედება არ ნიშნავს პრობლემების სრულად გადაწყვეტას.

მონაწილეები შეხვედრას მნიშვნელოვანს უწოდებენ, რადგან ბევრ მათთვის საჭირო შეკითხვებზე მიიღეს პასუხი.

დევნილთა სამმართველოს წარმომადგენლებმა თავის მხრივ პირობა დადეს, რომ წამოჭრილ  პრობლემებზე  დროულად მოხდება რეაგირება.

გრძელდება შეხვედრები რეპროდუქციულ ჯანმრთელობაზე. ქუთაისის, წყალტუბოსა და ხონის ქალთა მხარდაჭერის ცენტრებში მთელი თვის განმავლობაში სამი შეხვედრა ჩატარდა როგორც ქალებისათვის, ასევე გოგონებისათვის.

შეხვედრის თემა იყო: ფეხმძიმობასთან დაკავშირებული გართულებები, ექიმთან ვიზიტის აუცილებლობა ქალებისათვის, ინფორმაციები უფასო მამოგრაფიულ გამოკვლევასთან დაკავშირებულ საკითხებზე, მკერდის კიბოს საწინააღმდეგოდ მიმართული პრევენციული ღონისძიებები.

მონაწილეებს შორის იყვნენ ისეთებიც, რომლებმაც ინდივიდუალურად მოისმინეს გინეკოლოგის კონსულტაციები, სხვადასხვა თემებზე.

„რეგულარულად ვესწრები ფონდი „სოხუმის" მიერ გამართულ შეხვედრებს. უფრო თვითდაჯერებული გავხდი, ცხოვრებას სხვა თვალით ვუყურებ, ყველა ქალმა უნდა იცოდეს საკუთარი უფლებები, ეს ბევრ რამეს შეცვლის ჩვენს ცნობიერებაში და სრულფასოვანი საზოგადოების ჩამოყალიბებას ხელს შეუწყობს. - ასეთი პოზიცია ჰქონდათ წყალტუბოში გამართული  შეხვედრის მონაწილეებს.

გოგონებმა აქტიური დისკუსია გამართეს ისეთ საკითხებზე, როგორიცაა გენდერული თანასწორობა, ქალისა და მამაკაცის სოციალური როლები, ქართული მენტალიტეტი და სტერეოტიპები.

განხილულ იქნა ის საერთაშორისო დოკუმენტები, რომელიც ქალთა უფლებების დაცვას ემსახურება - რეზოლუცია 1325, 1820, პეკინის პლატფორმა.

კლუბზე მთავარი სადისკუსიო თემა მოახლოებული ადგილობრივი თვითმმართველობის არჩევნებია. ქალები თავიანთ წინასაარჩევნო განწყობას ხმამაღლა აფიქსირებენ.

ეცნობიან ინფორმაციებს იმის შესახებ, თუ როგორია ქალთა აქტივობა საზოგადოებრივ თუ პოლიტიკურ სფეროში მსოფლიოს სხვადასხვა ქვეყნებში - რუსეთში, უკრაინაში, ამერიკაში, ბულგარეთში.

ქალთა კლუბის წარმომადგენლები  თავიანთ აზრს გამოხატავენ კოსოვოს ადგილობრივი არჩევნებისა და უკრაინის საპრეზიდენტო არჩევნების შესახებ.

თებერვალს, ქ. ბათუმში, ფონდის მიერ გენდერული თანასწორობის პრობლემის კვლევის ფარგლებში, საკრებულოს იურიდიულ და საპროცედურო საკითხთა კომისიის თავმჯდომარესთან  ჩაღრმავებული ინტერვიუ შედგა. ინტერვიუს მიზანი რესპონდენტის პოზიციის გარკვევა იყო  ქალთა პოლიტიკური აქტივობის საკითხთან დაკავშირებით.

დასმული თოთხმეტი შეკითხვა  ინტერვიუერის მოსაზრებებს აფიქსირებდა  საკითხებზე, რატომ არის ქალი - პოლიტიკოსი რიცხობრივად ნაკლები მამაკაც პოლიტიკოსზე; რატომ უჭერენ ამომრჩევლები მამაკაც კანდიდატს  მხარს უფრო, ვიდრე ქალ კანდიდატს; არიან თუ არა პოლიტიკური პარტიები დაინტერესებული გენდერული თანასწორობით; როგორ შეიძლება შეიცვალოს პოლიტიკა იმ შემთხვევაში, თუ ქალთა მეტი რაოდენობა იქნება ჩართული ქვეყნის პოლიტიკურ ცხოვრებაში; რა მექანიზმებს უნდა მიენიჭოს უპირატესობა ქალთა წარმომადგენლობის გაზრდის ხელშესაწყობად  და ა. შ.

რესპონდენტის აზრით, ქალთა წარმომადგენლობის გაფართოება ქვეყნის პოლიტიკურ ცხოვრებაში პოზიტიური მოვლენაა, რომლის ხელშეწყობა სხვადასხვა სტრუქტურათა თანამშრომლობით უნდა იქნეს მიღწეული.

9-11 თებერვლის ჩათვლით ფონდი „სოხუმის" თანამშრომლებისათვის სამდღიანი ტრენინგ-სემინარი ჩატარდა.

რა უდევს საფუძვლად მოძალადის აგრესიას; რას ემყარება ჯანსაღი პიროვნებათშორისი ურთიერთობები; რა არის სწორი კომუნიკაცია,  რომელი სტერეოტიპები არღვევს ოჯახურ ჰარმონიას; - ამ და სხვა საკითხების განხილვისას მონაწილეთა აქტიურობამ პიკს მიაღწია.

  განსაკუთრებული ინტერესი ფორუმ-თეატრის ელემენტების მიმართ დაფიქსირდა, როცა როლური თამაშებით ხდებოდა კონფლიქტის არსის, მისი ფაზების, სხვადასხვა ეტაპზე კონფლიქტის შეჩერებისა და მართვის უნარის გაცნობა.

ფსიქოლოგის ბლოკი მოძალადისა და მსხვერპლის ფსიქოლოგიის განსაზღვრას მიეძღვნა.  იურისტმა ოჯახური ძალადობის წინააღმდეგ კანონზე, მსხვერპლის დაცვის ღონისძიებებზე ისაუბრა და დამსწრეთა  შეკითხვებს უპასუხა.

ფონდელები სამდღიან მუშაობას პროდუქტიულს უწოდებენ:

- საშუალება მოგვეცა საკუთარი მოსაზრება ხმამაღლა გამოგვეხატა.

-  აქ იყვნენ ტრენერები, ასისტენტები, ერთმანეთის საქმიანობაც შევაფასეთ.

- სხვა კუთხით შევხედეთ განხილულ საკითხებს. გამოცდილება მომავალ საქმიანობაში დაგვეხმარება.

ხობის ამომრჩეველ ქალთა კლუბმა გასვლითი შეხვედრა სოფელ ბიის საჯარო სკოლაში მოეწყო.

 შეხვედრას ამომრჩეველ ქალთა კლუბის წევრების გარდა ესწრებოდნენ ამავე სკოლის დირექტორი, პედაგოგები და უფროსკლასელები.

შეხვედრის მონაწილეებთან ერთად  აქტიური დისკუსია გაიმართა თემაზე - ქალი და პოლიტიკა, მოახლოებული ადგილობრივი თვითმმართველობის არჩევნები. განისაზღვრა ის ძირითადი  ხელისშემშლელი ფაქტორები, რომელიც ქალთა პოლიტიკურ აქტიურობას აფერხებს.

აფხაზეთის გეოგრაფია, ქალაქები და სოფლები, ტურიზმი - რომელიც ერთ-ერთი წამყვანი სფერო იყო აფხაზეთში - ამ და სხვა საკითხების განსახილველად ფონდი „სოხუმის" გოგონათა კლუბი „მინდა ყველაფერი ვიცოდე აფხაზეთზე" მეხუთე საჯარო სკოლაში შეიკრიბა.

ინტერაქტიულმა სავარჯიშომ გამოავლინა, რომ მონაწილეთა  დიდი ნაწილი არ იცნობდა აფხაზეთის ქალაქებსა და სოფლებს, ისტორიულ ძეგლებს.  ამიტომ გოგონებმა დიდი ინტერესით მოისმინეს ინფორმაციები საკუთარ მხარეზე.

- მე ქუთაისში დავიბადე, ამიტომ აფხაზეთს ცუდად ვიცნობ, კლუბის არსებობა მნიშვნელოვანია, რადგან ბევრ ინფორმაციებს ვიღებთ აფხაზეთზე. მინდა, რაც შეიძლება მეტი ვიცოდე საკუთარ კუთხეზე - ლიკა კოპალიანი.

გოგონებმა დასასრულს საშინაო დავალებაც მიიღეს „რა ვიცი აფხაზეთზე".

5 თებერვალს ფონდი "სოხუმის” ოფისში შედგა საინფორმაციო შეხვედრა, რომლის მიზანი იყო სტუდენტი საზოგადოების ინფორმირება კვლევის

"დიალოგის პროცესი  უსაფრთხოების გარანტიების ირგვლივ ქართულ-აფხაზური კონფლიქტის კონტექსტში” გარშემო და მათი პოზიციების დაფიქსირება კოფლიქტის მშვიდობიანი გზით გადაწყვეტის გზებზე, კერძოდ, ომის განუახლებლობის შესახებ ხელშეკრულებაზე.

შეხვედრას წერეთლისა და სუბტროპიკული მეურნეობის სახელმწიფო უნივერსიტეტების სტუდენტები ესწრებოდნენ. დისკუსიების შედეგად მონაწილენი შეთახმდნენ, რომ შეთანხმება ომის განუახლებლობის ირგვლივ აუცილებელია მხარეებს შორის ნდობის დამყარების კუთხით. თუმცა იყვნენ ისეთებიც, რომლებიც ყურადღებას ამახვილებდნენ იმ საფრთხეებზე, რომელსაც ის შეიცავს საქართველოსთვის. "სანამ არ მოხდება ნეიტრალიზება იმ საფრთხეებისა, რომელიც რუსეთის მხრიდან მოდის, არ შეიძლება საუბარი უსაფრთხოების სრულყოფილ გარანტიებზე’’;

"საჭიროა რეალური ინფორმაციის გავრცელება არსებული სიტუაციის ირგვლივ და აქ თავისი სიტყვა ახალგაზრდებმაც უნდა თქვან”;

 "რუსეთი აწარმოებს პერმანენტულ საინფორმაციო ომს საქართველოს წინააღმდეგ და შეცდომაში შეყავს, პირველ რიგში, საკუთარი საზოგადოება. ამიტომ ჩვენ ყველანაირად უნდა შევუწყოთ ხელი ობიექტური ინფორმაციის გავრცელებას”.  

4 თებერვალს ფონდი "სოხუმის” წარმომადგენლები წყალტუბოს საკრებულოს თავმჯდომარეს, მამუკა ლაღაშვილს შეხვდნენ. საუბრის თემა  განსახლების საკითხს ეხებოდა. განსახლების პროგრამის ფარგლებში წყალტუბოში პირველ ეტაპზე  ათი საცხოვრებელი კორპუსის მშენებლობა იგეგმება, რომელიც სავარაუდოდ, ორი წლის შემდეგ უნდა დასრულდეს და დაახლოებით 350 ოჯახს დააკმაყოფილებს.

ფონდის წარმომადგენლები დაინტერესდნენ, რა ელოდებათ იმ კოლექტიურ ცენტრებს, სადაც განსაკუთრებით ავარიული მდგომარეობაა.

 „სამოქალაქო დიალოგის პროცესი ადამიანური უსაფრთხოების და საომარი მოქმედებების განუხლებლობის გარანტიებზე ქართულ-აფხაზური კონფლიქტის კონტექსტში"- ამ თემაზე ფონდი „სოხუმის" მიერ საინტერესო ვორკ-შოპი გაიმართა ბათუმში, რომელსაც ესწრებოდნენ აჭარის უმაღლესი და ადგილობრივი საკანონმდებლო ხელისუფლების წარმომადგენლები, იურისტები და იძულებით გადაადგილებული პირები.

ვორკშოპის მონაწილეები გაეცნენ ამ თემაზე ექსპერტების მიერ მოკვლეულ მასალებს, დააფიქსირეს თავიანთი დამოკიდებულება თემისადმი და კვლევების შედეგებისადმი. ერთი ნაწილი მიიჩნევს, რომ ხელშეკრულება საომარი მოქმედებების განუახლებლობის გარანტიებზე მხოლოდ პოზიტიურ ცვლილებს მოიტანს, ხოლო მეორე ნაწილის აზრით, მსგავსი ხელშეკრულება ვერ შეცვლის არსებულ რეალობას.

პროექტის ფარგლებში ფონდი „სოხუმი" აწყობს ყოველთვიურ საინფორმაციო შეხვედრებს დასავლეთ საქართველოს ქალაქებში მოქმედ პოლიტიკურ პარტიებთან.

იანვარში პარტიებს მიეწოდათ ინფორმაცია ფონდის  მიზნებზე - ქალთა წარმომადგენლობის გაზრდა და მათი როლის გაძლიერება პოლიტიკურ პარტიებში. ასევე მნიშვნელოვანი იყო პარტიების მხრიდან ინფორმაციის მიღება, როგორ ემზადებიან ადგილობრივი თვითმმართველობის არჩევნებისთვის და რა შანსები არსებობს ქალებისათვის საარჩევნო სიებში მოსახვედრად.

შეხვედრები ჩატარდა შემდეგი პოლიტიკური პარტიების წარმომადგენლებთან: ერთიანი ნაციონალური მოძრაობა, რესპუბლიკური პარტია, ქრისტიან-დემოკრატიული მოძრაობა, ლეიბორისტული პარტია. 

რესპუბლიკურ პარტიაში აცხადებენ, საარჩევნო სიების შედგენა ეფუძნება ლიბერალურ პრინციპებს, რაც გულისხმობს კანდიდატების თავისუფალ შერჩევას, ქალებს და მამაკაცებს უფლება აქვთ თანაბრად იყვნენ წარმოდგენილები საარჩევნო სიებში. 

ერთიანი ნაციონალური მოძრაობის ზუგდიდის საქალაქო ორგანიზაციაში აცხადებენ, რომ პარტიის წევრ ქალბატონებს აუცილებლად მიეცემათ საკუთარი გამოცდილებისა და შესაძლებლობების გამოვლენის საშუალება, როგორც წინასაარჩევნო პერიოდში, ასევე არჩევნებში.

ქრისტიან-დემოკრატიული მოძრაობის ფოთის ორგანიზაციის თავმჯდომარემ, ლაშა ბერაიამ განაცხადა, რომ ათკაციან სიაში მეორე და მესამე ადგილზე  ის ქალბატონები იქნებიან წარმოდგენილნი, რომლებიც ხელმძღვანელობენ ჯანდაცვისა და განათლების შიდაპარტიულ კომიტეტებს.