...

ერთწლიანი მუშაობის შეფასება,რეზულტატები,პლიუსები და მინუსები -  თავის არსებობის მეოთხე წილიწადს ბათუმის ამომრჩეველ ქალთა კლუბი გასული წლის მუშაობის შეფასებას შეეცადა.

- მიმდინარე წელი გამორჩეული იყო წინა წლებისაგან. შეხვედრების თემატიკა გახდა მრავალფეროვანი, გავაფართოვეთ საქმიანობის არეალი, გადავახალისეთ ჯგუფები - ინგა მებონია, ბათუმის ქალთა კლუბის ლიდერი.

- ასეთი ტიპის შეხვედრები თანამშრომლობისა და აზრთა გაზიარების ძალიან კარგი შესაძლებლობაა -  ცისო ჩხეიძე.

კლუბის წევრთა აზრით ეს წელი იმითაც იყო გამორჩეული, რომ ჩატარდა ადგილობრივი თვითმმართველობის არჩევნები. კლუბის მუშაობა ამ  თვალსაზრისით საგრძნობლად გააქტიურდა. წინა წლებში ბათუმის საკრებულოში არცერთი ქალი არ იყო წარმოდგენილი - წელს კი მათი რაოდენობა ოთხია. ერთ-ერთი მათგანი - ნაზიბროლა ქობულაძე ამომრჩეველ ქალთა კლუბის წევრია.

ქუთაისში გამართულ ამომრჩეველ ქალთა კლუბის მორიგ შეხვედრას  არასამთავრობო და სამთავრობო სტრუქტურის წარმომადგენლებიც ესწრებოდნენ. შეხვედრაზე მოწვეული იყო   ქუთაისის საკრებულოს ერთადერთი წევრი ქალბატონი მანანა კიკაბიძე.

ახალგაზრდა იურისტთა ასოციაციის ქუთაისის ფილიალის ხელმძღვანელმა - ნინო თვალთვაძემ ფონდი „სოხუმის" მიერ ქობულეთში ჩატარებული ტრენინგის შესახებ   გააკეთა ინფორმაცია. თავის მხრივ საკუთარ შთაბეჭდილებებზე ისაუბრეს ტრენინგის მონაწილეებმაც. დალილა თამაზოღლის თქმით ტრენინგი იყო ინფორმაციულად დატვირთული:

- მივიღეთ ინფორმაცია ევროპულ ქარტიაზე, ადგილობრივი თვითმმართველობის ორგანოების კომპეტენციაზე, ბიუჯეტის მართვაზე.

კლუბის ერთ-ერთმა  წევრმა მერი ლობჟანიძემ მისი უბნის პრობლემა - მოუწესრიგებელი წყალსადენი - დასვა განსახილველად. საკრებულოს წევრმა მანანა კიკაბიძემ სამომავლო გეგმებზე იაუბრა.

კლუბის შეხვედრაზე გაკეთდა განცხადება მრგვალი მაგიდის შესახებ, რომელიც სამ სექტემბერს ქუთაისში, „იმპერიალის" საკონფერენციო დარბაზში ჩატარდება. შეხვედრას  ამომრჩეველ ქალთა კლუბის წევრები და სხვადასხვა საკრებულოების წევრი ქალბატონები დაესწრებიან.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

ამომრჩეველ ქალთა კლუბის წევრებმა შეაფასეს ერთწლიანი მუშაობა და ყურადღება გაამახვილეს ადგილობრივი თვითმმართველობის არჩევნებში ქალი კანდიდატების მხარდასაჭერად განხორციელებულ არაერთ მნიშვნელოვან და სასარგებლო ღონისძიებაზე მათი აქტიური მონაწილეობით.

ამომრჩეველ ქალთა კლუბის წევრთა მორიგი შეხვედრა ხონში აგვისტოს ცხელ დღეს  გაიმართა.

თაკარა მზიანი დღის მიუხედავად, აფხაზეთიდან დევნილი ქალბატონები მაინც აქტიურად ჩაებნენ კლუბის მუშაობაში. ისაუბრეს იმის შესახებ, თუ რამდენად ნაყოფიერი იყო ამომრჩეველ ქალთა კლუბის საქმიანობა ხონში ერთი წლის განმავლობაში. უნდა აღინიშნოს, რომ ამომრჩეველ ქალთა კლუბმა თავისი არსებობა ხონში ერთი წლის წინ დაიწყო. მისი წევრები აღნიშნავენ, რომ ამ ხნის განმავლობაში მათ ჰქონდათ შესაძლებლობა, გაემდიდრებინათ საკუთარი ცოდნა სხვადასხვა ინფორმაციით (კანონი ადგილობრივი თვითმმართველობის შესახებ და მასში შესული ცვლილებები), ესაუბრათ საჭირბოროტო საკითხებზე (სოციალური თუ განსახლების), ემსჯელათ პოლიტიკაში ქალთა მონაწილეობის აუცილებლობაზე, გენდერზე, კვოტირებაზე, შეხვედროდნენ მათთვის საინტერესო ადამიანებს - იმერეთის რეგიონში ლტოლვილთა და განსახლების სამინისტროს წარმომადგენლებს, დასწრებოდნენ ტრენინგ-სემინარს ქობულეთში (რომელი ერთი ჩამოთვალონ).

კლუბის წევრები მოხარულები არიან ფონდ "სოხუმთან" თანამშრომლობით, მათი თქმით, ეს არის ორგანიზაცია, რომელიც პოლიტიკაში ქალთა მოსვლას აქტიურად უჭერს მხარს.

- არასამთარარობო თუ სამთავრობო ორგანიზაციებმა, თუნდაც ჩვენმა კლუბმა მეტი ინიციატივები უნდა გამოიჩინოს ქართველი და აფხაზი ხალხის დასაახლოებლად! ჩვენ არასოდეს ვყოფილვართ ერთმანეთის მტრები, ქართველებსა და აფხაზებს შორის განხეთქილება მესამე ძალამ გამოიწვია! - ამომრჩეველ ქალთა კლუბზე ამჯერად სტრატეგიის - შერიგება ჩართულობის გზით განხილვა მოეწყო, აღნიშნულმა დოკუმენტმა დამსწრე საზოგადოების დიდი დაიტერესება გამოიწვია - გაიმართა დისკუსია თემაზე - ქართულ-აფხაზური ურთიერთობები.

კლუბის წევრები მიიჩნევენ, რომ ნდობის აღდგენაში განსაკუთრებით დიდი სახალხო დიპლომატიის მისია - ნათესაური კავშირების, შერეული ოჯახების, ქალთა როლი.

21 ივლისს ფონდი "სოხუმის" საკონფერენციო დარბაზში ამომრჩეველ ქალთა კლუბის წევრები შეიკრიბნენ - მოწვეულები იყვნენ საკრებულოსა და მერიის წარმომადგენლები.

კლუბის წევრებმა მიიღეს ინფორმაციები ადგილობრივ თვითმმართველობაში გენდერული მდგომარეობის შესახებ.

შეხვედრას  ქუთაისის საკრებულოს ერთადერთი წევრი ქალი მანანა კიკაბიძე ესწრებოდა. მან ისაუბრა იმის შესახებ, თუ რამ განაპირობა მისი მოსვლა პოლიტიკაში, რომელი სფეროები იქნება მისთვის პრიორიტეტული და რა მიმართულებით აპირებს ის თავის შემდგომ საქმიანობას.

კლუბის შეხვედრა ფონდი „სოხუმის" ოფისში გაიმართა რვა დევნილი გოგონას მონაწილეობით.

შეხვედრის თემა -  „ქართველთა და აფხაზთა სოციალურ-ეკონომიკური და ჰუმანიტარულ-კულტურული ერთიანობა". ეს საკითხები საინტერესო, მაგრამ ამასთანავე რთულიც იყო კლუბის მონაწილეთათვის.

„შეხვედრაზე შევიტყვე ქართველთა და აფხაზთა ისტორიულ, კულტურულ და რელიგიურ  ერთიანობაზე. ამ ერთიანობას საფუძვლად გეოგრაფიული და ეკონომიკური ერთიანი სივრცე დაედო.  ეს თემატიკა ძალიან მნიშვნელოვანია ჩემთვის,"- თამუნა სუბელიანი.

კლუბის მორიგი შეხვედრისათვისაც საინტერესო თემაა შერჩეული.

პროექტი ხორციელდება შვედეთის ქალთა ორგანიზაცია „ქალები ქალებისათვის" (KVINNA TILL KVINNA) მხარდაჭერით.

ამომრჩეველ ქალთა კლუბის მრავალპარტიულ შემადგენლობას კომუნისტური პარტიის წარმომადგენელიც შემოუერთდა. შორენა ბარამიძემ ამჯერად უფრო ახლოს გააცნო საკუთარი თავი დამსწრე საზოგადოებას - მისი თქმით, ამ პარტიაში გაწევრიანება სხვადასხვა ინტერესებით იყო გამოწვეული - მათ შორის რუსეთთან კეთილმეზობლური ურთიერთობა დაასახელა. კლუბზე 2010 წლის არჩევნებიც მიმოვიხილეთ - კლუბის წევრები მიიჩნევენ, რომ პოლიტიკაში ქალთა მონაწილეობის გაზრდა აუცილებელია, რადგან ქალი თავისი ბუნებით უფრო მგრძნობიარეა და ის უკეთ რეაგირებს სოციალურ, ჯანდაცვის, განათლებისა თუ კულტურის საკითხებზე.

ამომრჩეველ ქალთა კლუბის მორიგი შეხვედრა ხონის სამხედრო დასახლებაში შედგა.

ფონდი "სოხუმის" წარმომადგენელმა აფხაზეთიდან დევნილ ქალბატონებს 2010 წლის 30 მაისის ადგილობრივი თვითმმართველობის გააცნო არჩევნების შედეგები, რომლის ირგვლივაც დისკუსია გაიმართა, ქალებმა აღნიშნეს, რომ ხონის საკრებულოში არც ერთი ქალი არ არის წარმოდგენილი, რაც ცუდ შედეგზე მიუთითებს.

კლუბის წევრებმა  სოციალურ პრობლემებზეც ისაუბრეს - კიდევ ერთხელ დასვეს განსახლების საკითხი - რომ დევნილთა ნაწილი უკმაყოფილებას გამოთქვამს არასაკმარისი ფართის და უხარისხოდ შესრულებული  სარემონტო სამუშაოების გამო.

ქალებმა ყურადღება თავიანთ ყოველდღიურ ცხოვრებაზეც გაამახვილეს - აღნიშნეს, რომ დევნილი ქალების ცხოვრება ერთფეროვანია, მსგავსი შეხვედრები კი ახალი ინფორმაციის მიღების მეტ შესაძლებლობას იძლევა.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

„ქართულ-აფხაზური შერეული ოჯახები" - ასეთი იყო თემა გოგონათა კლუბისა  „აფხაზეთი - მინდა ყველაფერი ვიცოდე" , რომელიც ხონის ქალთა მხარდაჭერის ცენტრში ჩატარდა.

კლუბის მონაწილეთათვის თემა მახლობელი აღმოჩნდა. მათ ბევრი მაგალითი მოიყვანეს შერეული ოჯახების ცხოვრებიდან.

„ახლახან ჩემმა ბიძამ აფხაზი ქალი შეირთო. ძალიან ბედნიერები არიან. ასეთი მაგალითი ბევრია ჩვენს ირგვლივ, ეს ჩვენი ხალხების მშვიდობიანი მომავლის იმედს იძლევა," - აღნიშნა კლუბის ერთ-ერთმა წევრმა.

პროექტი ხორციელდება შვედეთის ქალთა ორგანიზაცია „ქალები ქალებისათვის" (KVINNA TILL KVINNA) მხარდაჭერით.

გოგონათა კლუბმა „მინდა ყველაფერი ვიცოდე აფხაზეთზე" ქუთაისსა და წყალტუბოში გამართა შეხვედრები.

ერთ-ერთ შეხვედრას დაესწრო შვედი მოხალისე ტერეზა სვედბერგი. რომელმაც ინტერესით მოისმინა დევნილი გოგონების მონათხრობი აფხაზეთის კულტურაზე, ტრადიციებზე, სამზარეულოზე.

მონაწილეები კმაყოფილები აღნიშნავენ, რომ კლუბი „მინდა ყველაფერი ვიცოდე აფხაზეთზე" მნიშვნელოვანია. რადგან ბევრ საინტერესო ინფორმაციებს იგებენ აფხაზეთზე. ყოველი შეხვედრა ერთმანეთისაგან განსხვავებულია, რაც მუშაობას საინტერესოს ხდის.   

პროექტი ხორციელდება შვედეთის ქალთა ორგანიზაცია „ქალები ქალებისათვის" (KVINNA TILL KVINNA) მხარდაჭერით.

- 2010 წლის ადგილობრივი თვითმმართველობის არჩევნების შედეგების მიხედვით ოზურგეთის საკრებულოში სამი ქალი იქნება წარმოდგენილი, მათ შორის ერთ-ერთი ოზურგეთის ამომრჩეველ ქალთა კლუბის ძველი და აქტიური წევრი  ირინა საჯაიაა -  ამ სასიხარულო ინფორმაციით დაიწყო კლუბის შეხვედრა ოზურგეთში.

აღინიშნა, რომ ირინა საჯაია საკრებულოში მუშაობის პერიოდში გამოირჩეოდა ინიციატივებითა და აქტიურობით. სასიხარულოა, რომ მას კიდევ ერთხელ მიეცა შანსი გააგრძელოს წინა წლებში დაწყებული მუშაობა. კლუბის წევრები მისგან  სიახლეებს ელოდებიან სხვადასხვა სფეროებში.

კლუბის შეხვედრაზე მონაწილეებმა კიდევ ერთხელ გაანალიზეს ადგილობრივი თვითმმართველობის არჩევნების შედეგები.  მიიჩნევენ, რომ საზოგადოება გენდერული თვალსაზრისით უფრო აქტიური გახდა, რაც მათი აზრით, წინასაარჩევნოდ გაწეული აქტიური მუშაობის შედეგია.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

ხობის ამომრჩეველ ქალთა კლუბის მორიგი შეხვედრა სოფელ ბიაში გაიმართა.

კლუბის ლიდერმა, მაჟორიტარობის კანდიდატმა  ქალბატონმა მანანა შულაიამ. რომელიც ამავე სოფელში იყრის კენჭს, ამომრჩეველ ქალთა კლუბის წევრებს, სოფლის მკვიდრ ქალბატონებს, საკუთარ სახლში უმასპინძლა.

-საკუთარ სახლში მოგიწვიეთ, რათა გაჩვენოთ, რომ მეც თქვენნაირი ქალი ვარ, იგივე პროლემები მაწუხებს, რაც თქვენს ოჯახებს. ჩვენ დღეს არ ვისაუბრებთ ზოგად საკითხებზე,  იმ კონკრეტულ პრობლემებზე შევჩერდებით, რომელიც ჩვენი სოფლის მოსახლეობას აწუხებს და დროულ გადაწყვეტას საჭიროებს.

შეხვედრაზე მანანა შულაიამ დამსწრეთ თავისი საარჩევნო პროგრამა გააცნო. აღნიშნა, რომ მისი გამარჯვების შემთხვევაში  პრიორიტეტი დასაქმება იქნება. რადგან როგორც დანარჩენ საქართველოში, ეს პრობლემა განსაკუთრებით მწვავედ დგას სოფელ ბიაში.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

ფონდი „სოხუმის" ოფისში ამომრჩეველ ქალთა კლუბის წინასაარჩევნო შეხვედრა შედგა.  კანდიდატებმა - ნატო ქათამაძე („ალიანსი საქართველოსთვის") და ლია გვენეტაძე („ქრისტიან-დემოკრატიული მოძრაობა"), რომლებიც ქუთაისის ამომრჩეველ ქალთა კლუბსაც წარმოადგენენ, თავიანთი საარჩევნო პროგრამებით წარსდგნენ კლუბის წევრების წინაშე.

პროგრამების წარდგენის შემდეგ კანდიდატებმა დასმულ შეკითხვებს უპასუხეს.

აღსანიშნავია, რომ კანდიდატი ქალბატონებისათვის პრიორიტეტულია სოციალური სფერო, ჯანდაცვა. განსაკუთრებულ მნიშვნელობას ანიჭებენ ბიუჯეტის სწორად განაწილებას.

გარკვეული საკითხების მიმართ შეხვედრის მონაწილეებს სხვადასხვა პოზიციები აღმოაჩნდათ, რაც ცხარე დისკუსიების საბაბი გახდა.

შეხვედრაზე აღინიშნა ისიც, რომ ამომრჩეველთა ინფორმირებულობის დონე გაიზარდა, როგორც საარჩევნო კანონმდებლობასთან, ასევე გენდერულ საკითხებთან მიმართებაში, რაც, მათი აზრით, არჩევნების შემდეგ გამოჩნდება და წინა წლებთან შედარებით საკრებულოში ქალების რაოდენობა გაიზრდება.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

წყალტუბოს ამომრჩეველ ქალთა კლუბზე წინასაარჩევენო განწყობაა.

შეკრებილებმა  მაჟორიტორობის კანდიდატებისაგან საარჩევნო პროგრამები მოისმინეს. აღნიშნული კანდიდატები ამომრჩეველ ქალთა კლუბის წევრები არიან.  

პროგრამების გაცნობის შემდეგ მონაწილეებმა შეკითხვებით მიმართეს კანდიდატები: რამდენად პრიორიტეტულია დევნილთა საკითხები, რას გააკეთებენ კანდიდატები საკრებულოში მოსვლის შემთხვევაში.   

შეხვედრის მონაწილეებმა განათლების სისტემაში არსებული პრობლემებიც წამოჭრეს და კანდიდატებისაგან მოისმინეს ინფორმაციები გამარჯვების შემთხვევაში რა სახის ცვლილებებს შეიტანენ ამ სფეროში.

მაჟორიტარმა კანდიდატებმა წამოჭრილ საკითხებზე ვრცლად ისაუბრეს, ისინი ვარაუდობენ, რომ წინა წლებთან შედარებით ადგილობრივ თვითმმართველობაში ქალების რიცხვი გაიზრდება, რაც იმის დასტურია, რომ ქალთა საკითხები უფრო პრიორიტეტული გახდება.

საინტერესო ინფორმაციებით დაიწყო ამომრჩეველ ქალთა კლუბი ოზურგეთში.  

„2010 წლის ადგილობრივი თვითმმართველობის არჩევნები - ქალთა პოლიტიკური მონაწილეობის გაზრდა საქართველოში" - ინფორმაცია 28 აპრილს, თბილისში გამართული კონფერენციის შესახებ  კლუბის წევრებმა ფონდი „სოხუმის" წარმოდგენლისაგან მიიღეს. მონაწილეები გაეცნენ ასევე, ამავე კონფერენციაზე მიღებულ სამოქმედო გეგმას, რომელსაც სხვადასხვა პოლიტიკური პარტიების წარმომადგენლები აწერენ  ხელს. მასში გაწერილია თუ რა კონკრეტული ნაბიჯები უნდა გადაიდგას ქართულ პოლიტიკაში გენდერული თანასწორობის მისაღწევად.

კლუბის წევრები მიიჩნევენ, რომ სამოქმედო გეგმა პოლიტიკურ პარტიებს ერთგვარ პასუხისგებლობას აკისრებს, რაც იმის გარანტი იქნება, რომ ამ გზით ქალები პოლიტიკაში ღირსეულ ადგილებს დაიკავებენ.

ქალთა კლუბის წევრებმა ასევე მიიღეს ინფორმაცია ახალციხეში ჩატარებული ტრენინგის შესახებ, რომელიც  ქალთა პოლიტიკური აქტიურობის გაზრდას ეხებოდა.

გაეცნენ იმ ქვეყნების გამოცდილებას, რომლებმაც გენდერული პრობლემები ქვეყანაში წარმატებით გადაჭრეს.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

როგორც ყოველთვის,  ნაყოფიერი იყო წყალტუბოში ჩატარებული ამომრჩეველ ქალთა კლუბი.

შეხვედრის მონაწილეებმა მოისმინეს ინფორმაციები საარჩევნო კანონთან და მასში შეტანილ ცვლილებებთან დაკავშირებით.

საუბარი იყო ადგილობრივი თვითმმართველობის არჩევნებში საზოგადოების ჩართულობის აუცილებლობაზე.

 შეხვედრაზე ცნობილი გახდა, რომ ამომრჩეველ ქალთა კლუბის ორი წევრი ადგილობრივი თვითმმართველობის არჩევნებში მონაწილეობს, მაია შალანბერიძე და ნანა იოსელიანი(ახალი მემარჯვენეები).

დეპუტატობის კანდიდატებმა განაცხადეს, რომ ამ გადაწყვეტილების მიღებაში მნიშვნელოვანი გავლენა იქონია კლუბის მუშაობამ.

პროექტი ხორციელდება შვედეთის ქალთა ორგანიზაცია „ქალები ქალებისათვის" (KVINNA TILL KVINNA) მხარდაჭერით.

"ჩვენ უნდა წავიდეთ წინ - მოდერნიზაციისაკენ, ევროკავშირისაკენ! ჩვენი მთავარი მესიჯი საზოგადოების მიმართ სწორედ ეს არის", - არმაზ კახიძე, ახალი მემარჯვენეები.

ბათუმში გამართულ ამომრჩეველ ქალთა კლუბს  პოლიტიკური პარტიების წარმომადგენელი მამაკაცებიც ესწრებოდნენ: „ქრისტიან-დემოკრატიული მოძრაობა" - ავთანდილ ჩიხვაძე, „ახალი მემარჯვენეები" - არმაზ კახიძე და შალვა გოგოტიძე.

პოლიტიკური პარტიების წარმომადგენლებმა რეგიონში არსებულ პრობლემებზე ისაუბრეს და პრიორიტეტულ სფეროებზე გაამახვილეს ყურადღება: ჯანდაცვა, განათლება, დასაქმება, გზები, ტრანსპორტი.

აქცენტი მოახლოებული ადგილობრივი თვითმმართველობის არჩევნებზე გაკეთდა. აღინიშნა ისიც, რომ ბათუმის სარკრებულოში არც ერთი ქალი არ არის წარმოდგენილი. მიზეზად ახალი მემარჯვენეების წარმომადგენელი არმაზ კახიძე ქალთა მხრიდან პასიურობას ასახელებს.

შეხვედრის დასასრულს ოპოზიციური პარტიის წარმომადგენლებმა პოლიტიკაში მოსვლის მსურველ ქალბატონთა მისამართით ერთგვარი მოწოდებაც კი გააკეთეს - "დიდი სიამოვნებით მივიღებდით ქალბატონებს ჩვენს რიგებში".

ბათუმის კლუბის წევრი ქალბატონები იმედოვნებენ, რომ აჭარაში მოქმედ პოლიტიკურ პატიებს სულ მალე ქალბატონებიც შეუერთდებიან.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

რას გვპირდებიან პოლიტიკური პარტიები, როგორია მათი წინასაარჩევნო პროგრამები, რამდენად არის დაცული გენდერული ბალანსი საარჩევნო სიებში - ამ თემებზე სასაუბროდ ქუთაისის ამომრჩეველ ქალთა კლუბს ესტუმრნენ სხვადასხვა პოლიტიკური პარტიების წარმომადგენლები(ახალი მემარჯვენეები, რესპუბლიკელები, ქრისტიან-დემოკრატები).

საარჩევნო პროგრამების განხილვის პარალელურად შეხვედრაზე აქცენტი გაკეთდა საარჩევნო სიებში არსებულ გენდერულ დისბალანსზე. პარტიის წარმომადგენლები უმთავრეს მიზეზად ქალთა ნაკლებ აქტიურობას მიიჩნევენ და თვლიან, რომ მეტი ინიციატივა უნდა წამოვიდეს ქალებისგან.

შეხვედრაზე საუბარი იყო ადგილობრივ თვითმმართველობაში ქალთა მოსვლის აუცილებლობაზე. უმრავლესობა მიიჩნევს, რომ ქალებისათვის ყოველთვის პრიორიტეტულია სოციალური საკითხები, საკრებულოში მათი მოსვლის შემთხვევაში გაიზრდება ხელმისაწვდომობა პრობლემის მოგვარებისადმი.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

ფოთის ადგილობრივი თვითმმართველობის არჩევნებში არაერთი ქალი კანდიდატია წარმოდგენილი. როგორც გაირკვა, ნაციონალურ პარტიას ოთხი ქალბატონი ყავს წარმოდგენლი თავის სიაში. მეოთხე ნომერი ამომრჩეველ ქალთა კლუბის წევრი დარეჯან ცხვიტარიაა.

ის უკვე მეორედ იყრის კენჭს ადგილობრივი თვითმმართველობის არჩევნებში. მიიჩნევს, რომ   მეტი ქალი პოლიტიკაში უფრო მეტად დაარეგულირებს სოციალურ პრობლემებს.

ამომრჩეველ ქალთა კლუბი ამჯერად ნაბადას მუნიციპალიტეტში გაიმართა - კანდიდატი დარეჯან ცხვიტარია თავის ამომრჩევლებს შეხვდა. საკრებულოში ყოფნის პერიოდში შესრულებულ საქმიანობებზე და სამომავლო გეგმებზე ისაუბრა.

მონაწილეები აქტიურობით გამოირჩეოდნენ. მათი შეკითხვებიდან გამომდინარე, გამოიკვეთა, რომ მოსახლეობისთვის სოციალური და ჯანდაცვის სფეროებია პრიორიტეტული.

კანდიდატი აღნიშნავს, რომ წლების განმავლობაში სწორედ ამ საკითხებით იყო დაკავებული და საკრებულოში მოსვლის შემთხვევაში უფრო აქტიურად გააგრძელებს  ამ მიმართულებით მუშაობას.

ოზურგეთის ამომრჩეველ ქალთა კლუბის მორიგ შეხვედრაზე განსაკუთრებული ყურადღება  ინფორმაციის საჯაროობაზე გამახვილდა. ხაზგასმით ითქვა, თუ რამდენად მნიშვნელოვანია მოსახლეობის ინფორმირებულობა საარჩევნო პროცესების დროს, რადგან მეტი კავშირები უნდა არსებობდეს ამომრჩეველსა თუ კანდიდატებს შორის.

ფონდი სოხუმის პროექტის ასისტენტმა მონაწილეებს გააცნო საარჩევნო პროცედურებთან დაკავშირებული ინფორმაციები.

ოზურგეთში ამომრჩეველ ქალთა კლუბის მორიგი შეხვედრა  კანდიდატ ქალებთანაა დაგეგმილი. კლუბის წევრები იმედოვნებენ, რომ  ამომწურავ ინფორმაციას მიიღებენ საარჩევნო პროგრამების შესახებ და ამასთანავე მიიღებენ პასუხებს მათთვის საინტერესო საკითხებზე, რომელიც ძირითადად სოციალურ, ჯანდაცვის, კულტურისა და განათლების სფეროებს უკავშირდება.

კლუბის წევრები თვლიან, რომ საარჩევნო პროცესებში ბევრი ქალია ჩართული, რაც მათი  აზრით ხელს შეუწყობს საარჩევნო პროცესების სამართლიან და ობიექტურ წარმართვას.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)